吴怡杏

ຕາລາງລາຍການ FM93Mhz

ດາວໂຫຼດ App CRI-FM93 ລະບົບ IOS

ດາວໂຫຼດ App CRI-FM93 ລະບົບ Android

FM93
ຄໍ​ລຳ
建党百年专题_fororder_建党百年专题Banner木

ທ່ານ​ນາງ​ເພີງ​ລີ້ຢວນໄດ້​ກ່າວ​ຄຳ​ປາ​ໄສ​ໃນ​ເວ​ທີ​ປຶກ​ສາ​ຫາ​ລື​​ກ່ຽວ​ກັບການ​ສຶກ​ສາ ແລະ ຫຼຸດ​ຜ່ອນ​ຄວາມ​ທຸກ​ຍາກ​ຂອງ​ແມ່​ຍິງ​ຂອງອົງ​ການ​ຮ່ວມ​ມື​ຊຽງ​ໄຮ​ຜ່ານທາງວີ​ດີ​ໂອ

2021-07-20 18:24:25 cri

    ວັນ​ທີ 20 ກໍ​ລະ​ກົດ​ນີ້, ໂດຍ​ຕອບ​ສະ​ໜອງ​ຕາມ​ຄຳ​ເຊື້ອເຊີນ, ທ່ານ​ນາງ​ເພີງ​ລີ້ຢວນ ພັນ​ລະ​ຍາ​ທ່ານ​ສີ​ຈີ້ນ​ຜິງ ປະ​ທານ​ປະ​ເທດ​ຈີນ, ທູດ​ພິ​ເສດ​​ເພື່ອຊຸກ​ຍູ້​ການ​ສຶກ​ສາ​ຂອງ​ເດັກ​ຍິງ ແລະ ແມ່​ຍິງ​ຂອງ​ອົງ​ການ​ການ​ສຶກ​ສາ ວິ​ທ​ະ​ຍາ​ສາດ ແລະ ວັດ​ທະ​ນະ​ທຳ ຫຼື UNESCO ໄດ້​ກ່າວ​ຄຳ​ປາ​ໄສ​ໃນ​ເວ​ທີ​ປຶກ​ສາ​ຫາ​ລື​​ກ່ຽວ​ກັບການ​ສຶກ​ສາ ແລະ ຫຼຸດ​ຜ່ອນ​ຄວາມ​ທຸກ​ຍາກ​ຂອງ​ແມ່​ຍິງ​ຂອງອົງ​ການ​ຮ່ວມ​ມື​ຊຽງ​ໄຮ​ຜ່ານທາງວີ​ດີ​ໂອ.

    ທ່ານ​ນາງ​ເພີງ​ລີ້ຢວນ​ກ່າວ​ວ່າ, ການ​ລຶບ​ລ້າງ​ຄວາມ​ທຸກ​ຍາກ ແລະ ​ການ​ສ້າງ​ຄວາມ​ສຸກ​ແມ່ນ​ອຸ​ດົມ​ຄະ​ຕິຮ່ວມ​ກັນ​ຂອງ​ແມ່​ຍິງ​ອັນ​ໄພ​ສານ. ເມື່ອ​ໄດ້​ຮັບ​ການ​ສຶກ​ສາ ແລະ ​ມີຄວາມ​ຮູ້​ຄວາມ​ສາ​ມາດ​ແລ້ວ, ແມ່​ຍິງ​ຈິ່ງ​ຈະ​ມີ​ກຳ​ລັງ​​ແຮງ​ເພື່ອ​ລຶບ​ລ້າງຄວາມ​ທຸກ​ຍາກ. ໂດຍ​ຜ່ານ​ການ​ສຸມຄວາມ​ພະ​ຍາ​ຍາມ​ຢ່າງ​ບໍ່​ລົດ​ລະ, ຈີນ​ສາ​ມາດ​ເອົາ​ຊະ​ນະ​ໃນ​ບັ້ນ​ລຶບລ້າງ​ຄວາມ​ທຸກ​ຍາກ​ຢ່າງ​ຮອບ​ດ້ານ, ແມ່​ຍິງ​ຫຼາຍ​ຮ້ອຍ​ລ້ານ​ຄົນ​ຂອງ​ຈີນ​ໄດ້​ຫຼຸດ​ພົ້ນ​ອອກ​ຈາກ​ຄວາ​ມ​ທຸກ​ຍາກ. ໂດຍ​ຜ່ານມາດ​ຕະ​ການ​ຕ່າງໆ, ຈີນ​ຮັບ​ປະ​ກັນ​ໃຫ້ແມ່​ຍິງ​ມີ​ສິດ​ໄດ້​ຮັບ​ກາ​ນ​ສຶກ​ສາ​ຢ່າງ​ສະ​ເໝີ​ພາບ​ກັນ, ເຮັດ​ໃຫ້​ເຂົາ​ເຈົ້າ​ກາ​ຍ​ເປັນ​ຜູ້​ໄດ້​ຮັບ​ຜົນ​ປະ​ໂຫຍດ, ຜູ້​ເຂົ້າ​ຮ່ວມ ແລະ ຜູ້​ປະ​ກອບ​ສ່ວນ​ໃນ​ການ​ລຶບ​ລ້າງ​ຄວາມ​ທຸ​ກ​ຍາກ. ​ເມື່ອລັດ​ໄດ້ເອົາ​ໃຈ​ໃສ່​ໃນ​ລະ​ດັບ​ສູງ, ອົງ​ການ​ຈັດ​​ຕັ້ງ​ສາ​ກົນໄດ້ຕັ້ງ​ໜ້າ​​ໃຫ້​ການສະ​ໜັບ​ສະ​ໜູນ, ບຸກ​ຄົນ​ວົງ​ການ​ຕ່າງໆ​ໄດ້ປະ​ກອບ​ສ່ວນ​ໂດຍ​ບໍ່​ເຫັນ​ແຕ່​ຕົວ​ແລ້ວ, ພາ​ລະ​ກິດ​ຫຼຸດ​ຜ່ອນ​ຄວາມ​ທຸກ​ຍາກ​ສຳ​ລັບ​ແມ່​ຍິງ​ກໍ່​ໄດ້ມີ​ກຳ​ລັງ​ແຮງ​​ຢ່າງ​ບໍ່​ຂາດ​ສາຍ. ອົງ​ການ​ປົກ​ຄ​ອງ​ແຂວງ​ກຸ້ຍ​ໂຈ່ວ​ຂອງ​ຈີນ​​ໄດ້ປະ​ຕິ​ບັດ “ແຜນ​ການຫຍິບ​ແສ່ວ” ເພື່ອ​ພັດ​ທະ​ນາ​ອຸດ​ສາ​ຫະ​ກຳ​ຫັດ​ຖະ​ກຳ​ທີ່​ມີ​ສີ​ສັນ​ພິ​ເສດ​ຂອງ​ແມ່​ຍິງ, ໄດ້​ເຮັດ​ໃຫ້​ແມ່​ຍິງ 5 ແສນກວ່າ​ຄົນ​ໄດ້ປະ​ກອບ​ອາ​ຊີບ​​ຢູ່ໃນ​ເຮືອນ​ຂອ​ງ​ຕົນ.

    ພາຍ​ໃຕ້​ການ​ຊ່ວຍ​ເຫລືອ​ຂອງ​ “ແຜນ​ການດອກ​ໄມ້​ຈູມ​ໃນ​ລະ​ດູ​ບານ​ໃໝ່”, ເດັກ​ຍິງ​ທຸກ​ຍາກ​ຈຳ​ນວນ 3 ລ້ານກວ່າ​ຄົນ​ໄດ້​​ຮຽນສຳ​ເລັດ, ຫລັງ​ຈາກ​ເຕີ​ບ​ໃຫຍ່​ຂຶ້ນ​ມາ​ແລ້ວ​​ກໍ​ໄດ້ສືບ​ຕໍ່​​ມອບ​ຄວາມ​ຮັກໃຫ້​ຄົນ​ອື່ນ​ດ້ວຍ​ຄວາມ​ຮູ້​ບຸນ​ຄຸນ.  ທ່ານ​ນາງຈ່າງ​ກຸ້ຍ​ເມີຍ​ໄດ້​ຍຶດ​ໝັ້ນ​ເຮັດ​ວຽກ​ເປັນ​ຄູ​ສອນຢູ່​ເຂດ​ພູ​ດອຍ​ທີ່ທຸກ​ຍາກ​ເປັນ​ເວ​ລາ 40 ກວ່າ​ປີ, ໂດຍ​ໄດ້​ສ້າງ​​ໂຮງ​ຮຽນ​ມັດ​ທະ​ຍົມ​ປາຍ​​ເພດ​ຍິງ​ທີ່​ບໍ່​​ເກັບ​ຄ່າ​ຫຍັງ​ໝົດ, ​ໄດ້ທຸ້ມ​ເທ​​ທັງກາຍ​ແລະ​ໃຈ​ຈົນ​ສຸດ​ຄວາມ​ສາ​ມາດ​ເພື່ອ​ຊ່ວຍ​ເຫລືອ​ເດັກ​ຍິງ​ເກືອບ 2000 ຄົນ​​ໃຫ້ບັນ​ລຸ​ຄວາມ​ຝັນ​ໃນ​ການ​ເສັງເຂົ້າ​ມະ​ຫາ​ວິ​ທະ​ຍາ​ໄລ​ໃຫ້​ສຳ​ເລັດ. ເລື່ອງ​ລາວ​ແບບ​ນີ້, ໄດ້​ເກີດ​ຂື້ນ​ຢູ່​ຜືນ​ແຜ່ນ​ດິນ​ຈີນ​ໃນ​ແຕ່​ລະ​ມື້.

    ທ່ານ​ນາງ​ເພີງ​ລີ້ຢວນ​ກ່າວ​ວ່າ: ປັດ​ຈຸ​ບັນ, ໃນ​ທົ່ວ​ໂລກ​ຍັງ​ມີ​ແມ່​ຍິງ​ຈຳ​ນວນ 435 ລ້ານ​ຄົນ​ໄດ້​ດຳ​ລົງ​ຊີ​ວິດ​ທ່າມ​ກາງ​ຄວາມ​ທຸກ​ຍາກ, ​ການ​ສຶກ​ສາ​ຍັງ​ມີຄວາມ​ແຕກ​ໂຕນ​ກັນ​ທາງ​ເພດ​​ຢ່າງ​ຈະ​ແຈ້ງ, ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ເຮັດ​ໃຫ້​ແມ່​ຍິງ​ຜະ​ເຊີນ​ກັບ​ສິ່ງ​ທ້າ​ທາຍ​ອັນ​ໃໝ່.

    ທ່ານ​ນາງ​ເພີງ​ລີ້ຢວນ​ກ່າວ​ຕື່ມ​ວ່າ: ນັບ​ແຕ່​ອົງ​ການ​ຮ່ວມ​ມືຊຽງ​ໄຮ້​ສ້າ​ງ​ຕັ້ງ​ຂຶ້ນ​ເປັນ​ເວ​ລາ 20 ປີ​ມາ​ນີ້, ເອື້ອຍ​ນ້ອງ​ແມ່​ຍິງຂອງ​ປະ​ເທດ​ຕ່າງໆ​ໄດ້​ຍຶດ​ໝັ້ນ“ ນ້ຳ​ໃຈ​ຊຽງ​ໄຮ້”, ແລກ​ປ່ຽ​ນ​ບົດ​ຮຽນ​​ໃນ​ການ​ພັດ​ທະ​ນາ​ແມ່​ຍິງ, ຊຸກ​ຍູ້​ການ​ຮ່ວມ​ມື​ໃນ​ຂົງ​ເຂດ​ຕ່າງໆ, ປະ​ກອບ​ສ່ວນ​ເຂົ້າ​ໃນ​ການ​ຊຸກ​ຍູ້​ການ​ຮ່ວມ​ມື​ໃນ​ຂອບ​ອົງ​ການ​ຮ່ວມ​ມື​ຊຽງ​ໄຮ້. ພວກ​ເຮົາ​ຄວນ​​ຫັນ​ປ່ຽນຄວາມ​ຮັກໃຫ້​ກາຍ​ເປັນ​ພຶດ​ຕິ​ກຳ​ຕົວ​ຈິງ, ຍຶດ​ໝັ້ນ​​ການ​ປະ​ຕິ​ບັດ​ໜາ​ທີ່​ເປັນ​ເວ​ລາ​ດົນ​ນານ, ສືບ​ຕໍ່​ລົງ​ເລິກ​ການ​ຮ່ວມ​ມື​ດ້ານ​ການ​ສຶກ​ສາ ແລະ​ຫລຸດ​ຜ່ອນ​ຄວາ​ມ​ທຸກ​ຍາກ​ໃຫ້​ກັບ​ແມ່​ຍິງ, ເຮັດ​ໃຫ້​ແສງ​ສະ​ຫວ່າງ​ແຫ່ງ​ການ​ສຶກ​ສາ​ເປັນ​ໄຟ​ເຍືອງທາງ​ແຫ່ງ​ຄວາມ​ຫວັງ​​ສຳ​ລັບ​ແມ່ຍິງ, ເຮັດ​ໃຫ້​ແມ່​ຍິງ​ຫລາຍກວ່າ​ເກົ່າ​ໄດ້​ຮັບ​ໂອ​ກາດ​ທີ່​ດີ​ໃນຊີ​ວິດ​ທີ່ມີ​ສີ​ສັນ.

    ​​ເວ​ທີ​ປຶກ​ສາ​ຫາ​ລື​ຄັ້ງ​ນີ້​ແມ່ນ​ຮ່ວມ​ກັນ​ຈັດ​ຂຶ້ນ​ໂດຍ​ສະ​ຫະ​ພັນ​ແມ່​ຍິງ​ທົ່ວ​​ປະ​ເທດ​ຈີນ, ຄະ​ນະ​ກຳ​ມະ​ການ​ຮ່ວມ​ມື​​ມິດ​ຕະ​ພາບ​ຖານບ້ານ​ໃກ້​ເຮືອນ​ຄຽງ​ອົງ​ການ​ຮ່ວມ​ມື​​ຂອງຊຽງ​ໄຮ້, ແລະ​ກອງ​ເລ​ຂາ​ອົງ​ການ​ຮ່ວມ​ມື​ຊຽງ​ໄຮ້.

ຄຳ​ເຫັນ

0